Consequenzas, sch'ins schess NA?
Questa cuminanza fa valair ch’il guaud da Laax vegniss sfigurà e ch’i dess pli bler traffic e canera. E plinavant pretenda la cuminanza ch’i vegnia votà a scrit a la radunanza communala, per «che l’atgna vusch n'haja naginas consequenzas persunalas.»
Sco il president communal da Laax Franz Gschwend di, possia la radunanza pretender scrutini cun ina maioritad da 25% da las vuschs. Quai saja previs en la constituziun communala. Ma el refusescha la renfatscha ch’ins stoppia quintar cun consequenzas sch’ins dia NA al project. Quai saja inventà. Laax investeschia bler ils ultims onns, ed el n'haja mai constatà ch’in mastergnant n'haja betg survegnì ina lavur mo perquai ch’el saja stà dad in autra opiniun che la suprastanza.
Plivalur da ca. 5 milliuns francs
Franz Gschwend di ch’ins na possia era betg dir ch’il guaud vegnia sfigurà, sco ch'igl è scrit en il figl sgulant. Ma cun la senda da tschimas possian ins preschentar meglier il spazi da viver en il guaud. E pertutgant la critica ch’i dettia pli blera canera e traffic di el ch’in bus giaja fin Dimplaun, nua che la glieud descendia da la senda da tschimas. I dettia era trais parcadis per persunas impedidas. Els na veglian dentant dapli traffic a Dimplaun.
Ma el e ses consuprastants veglian dentant cumbatter per la senda da tschimas. Quella portia ina plivalur da ca. 5 milliuns francs ad onn. I saja surtut er ina purschida cumplementara per il turissem da stad.
La cuminanza d'interess encunter la senda da tschimas n'ha betg vulì prender posiziun envers RTR.
Cifras e fatgs:
- La senda da tschimas duai vegnir fatga cun lain e custa 7,5 milliuns francs.
Ella collia sin punts e 5 plattafurmas panoramicas Laax Vitg (a Dimplaun)
cun Murschetg.
- La senda è 2’020 meters lunga e l’autezza variescha da 5 fin 13 meters.
- A l’entrada ed a la sortida vegnan construidas turs cun ina stgala ed in ascensur (a l’entrada a Murschetg datti er ina ruschnera).
- Las gruppas avisadas èn famiglias.
- Per il manaschi vegn fixà in contract da gestiun cun l’Arena Alva SA.
- Sche la radunanza communala di GEA al project ston anc ils proprietaris dal funs dar lur consentiment, e la lubientscha da bajegiar sto era vegnir dada.
- Sche tut va sco previs vul ins cumenzar a bajegiar l’avust 2019, la senda da tschimas pudess vegnir inaugurada l’october 2020.
RR actualitad 06:00
