Siglir tar il cuntegn

Header

cuntegn

Laax Premi Quarta Lingua va a la «Sutga Rumantscha»

La «Sutga Rumantscha» ch'ha survegnì il premi da la «Quarta lingua» fa part dal concept scenografic dal nov wellnessHostel 3000 a Laax. Il premi da la Quarta Lingua è dotà cun 10’000 francs.

audio
Sutga rumantscha: Nova attracziun en il wellnessHostel
ord Actualitad dals 24.11.2021.
laschar ir. Durada: 2 minutas 31 Secundas.

Ina segunda è sin «turnea»

Sviluppà la sutga ha ina gruppa cun l’architect e scenograf Matthias Schnegg dal biro Groenlandbasel ensemen cun Cornelia Vinzens. Cun la sutga culturala interactiva pon ils giasts emprender d’enconuscher il linguatg, il territori e la cultura rumantscha – e quai a moda cumadaivla e divertenta (actur: David Flepp). Quai essend ina staziun interactiva cun autpledaders e tablet. Ina segunda sutga rumantscha saja sin turnea dad in albiert a l'auter – ed ins la possia era prender a fit per occurrenzas spezialas.

«Emprender sin viadi»

Cun questa sutga tegnan ils Albierts da giuventetgna svizzers quint da lur credo «emprender sin viadi» ed intermedieschan a moda divertenta aspects dal rumantsch a lur giasts, hai gì num a la preschentaziun.

Questa sutga sensibiliseschia ils giasts per il rumantsch, di il secretari general da la Lia Rumantscha Diego Deplazes.

Jau chat che quai è in project fitg innovativ e creativ che vegn segir a far bler plaschair als giasts.
Autur: Diego Deplazes Secretari general da la Lia Rumantscha

La presidenta da la Quarta Lingua, Petra Camathias, di ch'i saja interessant ch'i dettia musica, cultura, insatge per ils uffants, ch'ins possia emprender da dumbrar e ch'ins audia ils differents idioms. Questa purschida mussia la varietad da la Svizra e collia tuts cun la tgina rumantscha.
L'uniun «Quarta Lingua» datti dapi 1972. Ella sustegn la lavur culturala rumantscha e s’engascha per derasar quella er ordaifer la Rumantschia.

RTR novitads 06:00

Artitgels legids il pli savens