Siglir tar il cuntegn
Inhalt

Surselva Laax: Project da jugi survegn furma

La radunanza communala da Laax ha approvà in credit da CHF 850'000.- per la planisaziun detagliada da la nova jugi e dal bogn cuvert.

Illustraziun da l'entrada da la nova jugi a Laax.
Legenda: Illustraziun da l'entrada da la nova jugi a Laax. SSA Architekten AG

«wellnessHostel3000 & Aua Grava» - quai è il num da la nova jugi cun bogn cuvert e zona da wellness a Laax. La finamira da quai project è da sanar il bogn cuvert Aua Grava e las zonas da wellness e fitness existentas, e da construir gist dasper il bogn in nov albiert per giuventetgna cun 150 letgs.

Entras la cumbinaziun da bogn public e jugi pudain nus optimar il manaschi, nizzegiar sinergias ed uschia garantir la rentabilitad.
Autur: Franz GschwendPresident communal da Laax

Il nov bogn cuvert e las zonas da wellness/fitness duain vinavant restar avertas al public.

Architects da Basilea, inschigners da Cuira

Gudagnà la concurrenza d'architects publica ha il project «Mira Val» da la SSA Architekten SA (Basilea) e dal biro d'inschigners Ferrari Gartmann Ingenieure SA (Cuira). Ils architects da Basilea han gia planisà e realisà l'albiert per giuventetgna cun bogn cuvert e wellness a Saas-Fee, l'emprim albiert da quai gener insumma. En tut èn set projects vegnids inoltrads per la concurrenza.

Herbert Schmid, l'architect da SSA Architekten SA cun il model da ses project.
Legenda: Herbert Schmid, l'architect da SSA Architekten SA cun il model da ses project. RTR, Linus Livers

Avertura enviern 2020

Patrun da construcziun da quella nova surbajegiada è la vischnanca da Laax, sco gestiunaris dal albiert da giuventetgna e dal bogn cuvert èn previs l'organisaziun Albierts da giuventetgna svizzers e la Fundaziun svizra per turissem social. L'entschatta da las lavurs da construcziun è planisada per la primavaira 2019, l'avertura da la nova jugi e dal bogn cuvert duai succeder l'enviern 2020.

RR actualitad 11:00