Ils derschaders da Losanna dattan raschun a Heveltia Nostra che ha recurrì tras tuttas instanzas. Aposta per la surbajegiada «Lag-Pign» aveva Laax decidì il 2010 in plan da quartier. Lez preveseva da bajegiar en pliras etappas chasas cun abitaziuns da vacanzas.
Per mintga etappa ha Laax dà ina nova lubientscha – tranter auter era pervi da la contingentaziun d'abitaziuns da vacanzas che valeva da lez temp. La gronda part da la surbajegiada «Lag-Pign» cun las tipicas chasas Maissen han ins realisà en il fratemp.
Ultima etappa na po betg vegnir realisada
Avant dus onns ha Laax dà la lubientscha per ina da las davosas etappas cun duas chasas cun pliras abitaziuns da vacanzas. Encunter lezza lubientscha ha Helvetia Nostra recurrì cun l'argument che Laax na dastgia betg lubir anc dapli abitaziuns da vacanzas.
La vischnanca ed ils impressaris han fatg valair ch'il plan da quartier «Lag-Pign» existiva gia avant la limitaziun dad abitaziuns secundaras. Il tribunal federal dat uss dentant raschun a Helvetia Nostra.
En sia sentenzia publitgada l'emna passada punctueschan ils derschaders da Losanna ch'il plan da quartier prevesevia etappas e ch'entras la contingentaziun n'hajan ils impressaris mai gì ina garanzia da survegnir ina lubientscha per dapli abitaziuns da vacanzas.
RTR novitads 12:00