«Solem ruaus cheu sin la riva, d’umbriva stat il lag curclaus»: Il text da la chanzun «La sera sper il lag» è ina da las enconuschentas poesias da Flurin Camathias. Mo el duai anc vegnir pli «palpabel», era a las generaziuns vegnintas. Quai di il president da la Fundaziun Pro Laax Erwin Ardüser. Perquai s’engaschan var 200 persunas, saja quai chors, uniuns, scolas, artists ed auturs, per quest onn commemorativ.
Concert vegn spustà
Il concert, previs ils 6 e 7 da mars, stoppia vegnir spustà per in onn, di Erwin Ardüser. Chantaduras e chantadurs dal Chor maschadà Laax, dal chor viril Laax e d’in nov chor d’uffants avevan gia cumenzà ad exercitar. Spustar ston ins forsa era l’avertura da la «Cularta», nua che 3 artists (Annatina Dermont, Roman Schmid e Remo Arpagaus) realiseschan ina installaziun audio-visuala.
Els sa fatschentan cun la persuna e l’ovra da Flurin Camathias.
Exposiziun en baselgia ed en chapluttas
Ina avischinaziun al poet è era l’exposiziun ambulanta. Quella vegn realisada en la baselgia parochiala a Laax ed en las chapluttas da Breil e Siat. En quels lieus è Flurin Camathias stà plevon. Diesch artists prendan part.
L’idea è, che nus avain trais exposiziuns ch'èn era il medem mument avertas.
In cudesch
Gia 1971 èn ovras da Flurin Camathias vegnidas edidas. Uss datti puspè in cudesch. Plirs auturs scrivan sur dal poet, sia lavur sco spiritual e sia vita.
Nus enconuschain sias ovras, mo pli pauc il carstgaun.
Planisadas èn er ulteriuras activitads. Uschia per exemepl l’engaschi da scolaras e scolars sco poets. Els transponan poesias da Flurin Camathias en lur linguatg en il temp dad oz.
