Igl è in novum en il Grischun: La cumbinaziun dad in albiert da giuventetgna cun in bogn cuvert en il medem bajetg. Ils 18 da december 2020 vegnan il wellness Hostel 3000 ed il bogn Aua Grava avert.
Il bogn ha fatg quitads
Dapi l’avrigl 2019 è il bogn cuvert Aua Grava serrà. Suenter han las lavurs cumenzà, e malgrà il virus progredeschian quellas tenor plan, ha il president communal da Laax Franz Gschwend ditg. Il mir, il tetg, las fanestras e la fatschada da lain fin la terza da sis auzadas èn fatgas. Uss suonda la construcziun interna.
Franz Gschwend è persvadì da la cumbinaziun respectiv da la collavuraziun tranter albierts da giuventetgna ed il bogn cuvert. Dad ina vart quinta el ch’i dettia dapli pernottaziuns per il vitg da Laax. Da l’autra hajan els stuì renovar il bogn, perquai ch'els n'hajan betg vulì serrar el.
Il bogn cuvert ha fatg quitads. El ha custà fitg bler e la tecnica na è betg stada moderna avunda pli.
Model da success a Saas-Fee
La cumbinaziun d’albiert da giuventetgna e bogn cuvert datti gia a Saas-Fee en il chantun Valleis. Sco la scheffa dals albierts da giuventetgna en Svizra Janine Bunte di, hajan els success cun quest model:
Nus essan plain speranza che nus pudain era manar l’albiert a Laax cun grond success.
Intginas cifras dal wellness Hostel 3000:
- 158 letgs
- lavur per 25 persunas (incl. bogn)
- ca. 27’000 pernottaziuns ad onn
- pliras saunas, bogns, fitness e restaurant
- manader è Reto Denneberg (fin uss ha el manà l’albiert a Lai-Valbella)