Blera naiv durant l'enviern n'influenzescha betg mo il livel da l'aua en ils lais da fermada, era il Lag la Cauma a Flem reagescha sin il quantum naiv che giascha la primavaira anc en ils auts. La blera naiv da quest onn dat ina tscherta segirtad als responsabels ch'il livel dal lai saja in bun quest onn.
La primavaira decida
Bunamain uschè impurtant sco il quantum da la naiv è dentant, quant svelt che quella lieua. Capita quai fitg spert, lura emplaina l'aua il sistem d'aua sutterran ed qua tras era il Lag la Cauma. Lieua la naiv fitg plaun, datti percunter ina sublimaziun. Quai vul dir ch'ina tscherta part da la naiv vapurisescha e manca uschia per emplenir il lai.
Per il cas ch'i ha memia pauc aua en il lai, datti la pussaivladad d'emplenir quel cun aua supplementara ord il sistem da drenascha dal tunnel dal sviament da Flem. Aua che vegn tenor Marco Maranta, manader da l'Uffizi da bajegiar a Flem controllada permanent ed ha qualitad d'aua da baiver.
RR actualitad 12:00