Dapi il glindesdi suentermezdi è il Lai grond da Laax accessibel per viandar e per ir cun scursalets. Quai pon ins dentant far mo sin atgna responsabladad. Cun placats fa la vischnanca attent che tuts stoppian duvrar la medema entrada per vegnir sin il lai. Là nua che l’entrada sa chatta è il glatsch vegnì tractà cun aua uschia ch'el è pli segir. Ils urs dal lai èn adina il pli sensibel da rumper en.
Nus avain vulì porscher ina attracziun per osps ed indigens durant il temp che bleras chaussas èn restrenschidas.
La davosa giada è il glatsch dal Lai grond da Laax stà avert avant dus onns – quella giada dentant be per in sulet di. Questa emna cun fradaglias empermetta porbabel ina avertura pli lunga. I dovra numnadamain blera fradaglia e pauca naiv per pudair tegnair avert il glatsch natiral sin il Lai grond.