Siglir tar il cuntegn

Header

audio
Quant lunsch è il project da Lai Salischinas a Sumvitg
Or da Actualitad dals 11.10.2021.
laschar ir. Durada: 03:34 minutas.
cuntegn

Lai Salischinas Diego Deplazes nov president – TCS probabel gestiunari

L’uniun «Lag Salischinas» ha elegì il deputà e secretari generala da la Lia Rumantscha Diego Deplazes sco president. El è il segund president da l’uniun fundada il 2017 e suonda a Rino Caduff ch’aveva demissiunà ord motivs persunals.

Cun Diego Deplazes hajan ins chattà ina persuna cun ina gronda rait da contacts, indigena e fitg engaschada, uschia il vice-president Fabian Collenberg ch’ha manà ils ultims mais ad interim l’uniun. Las sfidas che spetgian uss sajan grondas ed i basegnia solidaritad ed engaschi da mintgin, uschia Collenberg en ses pled d’avertura. Ma ins saja stà fitg activs ils ultims mais, era sche la communicaziun cun las commembras ed ils commembers haja patì ils ultims mais, concedan ils responsabels.

Il TCS duai daventar gestiunari e partenari

Uschia hajan ins chattà in pussaivel gestiunari per il campadi e quai gist in dals impurtants e gronds en Svizra. Il TCS maina gia il campadi a Mustér ed era ulteriurs campadis en il Grischun ed ins veglia rinforzar la preschientscha en la regiun cun ina pussaivla investiziun en il project «Lag Salischinas», uschia Oliver Gruetzner, manader turissem e temp liber tar il TCS. La cunvegna d’intenziun saja suttascritta, uss saja impurtant da chattar ulteriuras pussaivladads da la collavuraziun ed alura fixar a lunga vista quels, uschia Gruetzner.

Vischnanca gioga en futur rolla pli impurtanta

La vischnanca da Sumvitg vegn cun las novas structuras a surpigliar en il futur ina rolla pli prominenta. Uschia vegnia la vischnanca en futur ad esser al timun dal project, quai saja tranter auter era in giavisch dal chantun, uschia ils responsabels a la radunanza generala. Las persunas da la suprastanza da l’uniun vegnan en futur a prender plaz en tut las cumissiuns, ma l’uniun gioghia in'ulteriura rolla impurtanta, uschia era il president nov Diego Deplazes. Cun ses rodund 800 commembras e commembers e quels da la gronda part da la regiun, saja surtut la voluntad da la populaziun da sentir en l’uniun e era il squitsch sin las instituziuns creschi cun in tal sustegn.

Aquista da terren resta problem

Cumprar il terren necessari saja in dals craps da scarpitsch dal project. Perquai hajan ins era adattà il perimeter dals lais planisads. La gronda part dal terren è uschia en possess da la vischnanca da Sumvitg. Per l’ulteriura part saja uss planisà ina cumissiun d’agricultura ch’haja gia cumenzà cun la lavur, dentant in pass impurtant hajan ins fatg. Uschia sajan ils purs sa cunvegnids da betg lavurar encunter il project, mabain da vesair el sco schanza. Dentant vegn il project propi sulet realisà cun la collavuraziun dals possessur dal terren e quai saja terren per part cultivà dapi generaziun da las medemas famiglias e perquai era collià cun bleras emoziuns, quai che na fetschia betg pli simpel la situaziun, uschia Fabian Collenberg.

RTR novitads 06:00

Artitgels legids il pli savens

Scrollar a sanestra Scrollar a dretga