La fin d’avrigl èn ils lais da fermada en Svizra per gronda part stads svidads. Las reservas d'aua en ils lais eran pitschnas, dentant betg alarmantas. Cun temperaturas pli autas lieua la naiv ed ils lais s’emplainan puspè – u duessan almain s'emplenir. Ma la pauca naiv da l'enviern passà procura consequentamain era per pli pauca aua en ils lais.
La naiv n’è betg decisiva
La midada dal clima fa ch'i dat adina pli pauca naiv, respectiv ch'il cunfin da naiv s'auza adina pli fitg. Blera naiv vul era dir blera aua en ils lais da fermada.
Igl ha actualmain pli pauca naiv en ils auts. Tuttina quintain nus d'avair plain ils lais da fermada sin l’atun.
Midada dal clima nagin dischavantatg
Per las ovras electricas che produceschan energia idraulica na dependia la situaziun d'aua en ils lais da fermada dentant betg dal quantum da naiv ch’i dat durant l'enviern. Principal saja ch'i dettia avunda precipitaziuns durant l'entir onn, declara Rudolf Büchi, il manader da las ovras idraulicas da l'Axpo en Surselva.
L'enviern actual è forsa stà in zic pli sitg che la media, vis sur l'entir onn sa mida dentant nagut.
En tge furma che l'aua vegn – naiv u plievgia- na saja betg impurtant per las ovras electricas idraulicas. Philippe Heinzer da las ovras electricas da Turitg, l'EWZ, ha declarà ch'ins haja retschertgà ils scenaris per l’avegnir:
Nus avain laschà far in studi co l'idrologia pudess sa sviluppar en l'avegnir. Quel vegn a la conclusiun che las precipitaziuns restian constantas sur l'onn.
Las precipitaziuns vegnan a sa midar in zic en il decurs da l'onn. Per las ovras idraulicas vegnia dentant nagut a sa midar fundamentalmain pervia da la midada dal clima, declara era Rudolf Büchi da l'Axpo.