Siglir tar il cuntegn
Inhalt

Surselva Las bancas Raiffeisen Surselva e Raiffeisen Tumpiv vulan fusiunar

Ina gruppa da lavur cun represchentants da las duas bancas è sa fatschentada cun l’avegnir ed è vegnida a la conclusiun, ch’ina fusiun saja la meglra soluziun. Quai scrivan las duas bancas la sonda en ina brev a lur commembers.

Las bancas Raiffeisen Surselva (san., sedia principala Glion) e Raiffeisen Tumpiv (sedia Breil).
Legenda: Las duas bancas Raiffeisen: La Raiffeisen Surselva cun la sedia principala Glion e la Raiffeisen Tumpiv a Breil. RTR, Carlo Albin

Las suprastanzas da la Banca Raiffeisen Surselva e la Banca Raiffeisen Tumpiv han communitgà la sonda en ina brev a las commembras ed ils commembers, ch’ina fusiun saja la meglra soluziun per l'avegnir.

Ina fusiun fetschia senn ord differentas raschuns, scrivan las bancas

Quai cunzunt per che la Banca Raiffeisen Tumpiv possia ademplir vinavant las leschas e normas per bancas adina pli cumplexas. Plinavant fetschia ina fusiun senn er pertutgant il potenzial da far fatschentas e l'infrastructura.

Decisiun la primavaira 2018

Sur da la fusiun decidan las commembras ed ils commembers da las duas bancas: La Banca Raiffeisen Tumpiv durant la radunanza generala mez mars 2018, la Banca Raiffeisen Surselva en ina votaziun per correspundenza tochen entschatta matg 2018.

RR actualitad 11:00

Las duas bancas èn...

  • dad ina vart la Banca Raiffeisen Surselva cun 6 filialas a Glion (sedia principala), Flem, Laax, Sursaissa, Vella e Val. La summa da bilantscha munta a circa 620 milliuns francs
  • da l'autra la banca Raiffeisen Tumpiv che ha sulet ina filiala a Breil ed ina summa da bilantscha da circa 80 milliuns francs.