Siglir tar il cuntegn

Header

Navigaziun

cuntegn

Surselva «Las Valerusas» turnan

La Lumnezia vul sa deditgar ad in project istoric: In gieu en il liber duai raquintar il 2021 l'istorgia da la Lumnezia e regurdar a sias dunnas «valerusas» – e quai ord vista odierna.

Davos l'idea dal gieu en il liber, il «spitachel 2021», stat la fundaziun da cultura Lumnezia. Ella ha incumbensà il teatrist Lumnezian Roman Weishaupt d'elavurar ina idea. Per realisar l'onn 2021 il toc en il liber datti uss trais pitgas da sustegn: La vischnanca Lumnezia, la fundaziun da cultura Lumnezia e da l'uniun da teater Cuschnaus.

«Las Valerusas» en la tradiziun istorica

Personen-Box aufklappenPersonen-Box zuklappen

La tradiziun istorica da la Lumnezia raquinta da «las Valerusas»: Uschia duajan las dunnas lumnezianas esser sa participadas l’onn 1352 da maniera eroica en il cumbat cunter l’armada dal cont Albrecht da Werdenberg. Grazia a las dunnas ch’hajan attatgà tar la porta da Porclas ina part da la schuldada cun crappa e laina saja gartegià da stgatschar ils invasurs. Dapi lura ha num la porta da las dunnas e las Lumnezianas èn daventadas «las Valerusas».

Il gieu en il liber – in project en svilup

La preschentaziun da l'idea e vegnida fatga durant la fiera da Bumaun a Degen. Anc è il gieu en il liber pir en il stadi da project e perquai è ina pagina en la rait il pli concret ch'i dat enfin uss: Sin quella pagina po s'inscriver tgi che ha interess per il project.

Ch'il project stat pir al cumenzament mussa er, ch'il toc n'è betg anc scrit: Perquai èsi er pussibel da purtar atgnas ideas che vegnan la fin finala integradas en il spectacul.

L'iniziant Roman Weishaupt veglia raquintar l'istorgia da la Lumnezia ord vista odierna mistica ed istorica, ha el raquintà. Sch'il toc è avant maun vegnia lura er decis, nua ch'il gieu en il liber duai avair lieu l'onn 2021.

L'urari per la naschientscha dal gieu en il liber

  • Primavaira 2019 – gruppa preparatorica
  • Atun 2019 – comité d'organisaziun
  • Primavaira 2020 – decisiuns artisticas
  • Atun 2020 – emprimas emprovas
  • Primavaira 2021 – segund bloc d'emprovas
  • Stad 2021 – producziuns

RR actualitad 12:00