Siglir tar il cuntegn

Header

cuntegn

Surselva Lavurà pli che 20 onns per la Pro Senectute

Silvio Albin ha manà davent dal 1995 il post da cussegliaziun Surselva. Uss è el vegnì pensiunà.

audio
Bunura: Pro Senectute Surselva - adia da Silvio Albin
ord Actualitad dals 01.09.2016.
laschar ir. Durada: 2 minutas 56 Secundas.

Cura che Silvio Albin è daventà ils 1 da favrer 1995 il manader dal post da cussegliaziun Surselva da la Pro Senectute Grischun avess el mai pensà ch'el vegni a far quella lavur enfin sia pensiun. Blers differents projects e la libertad d’esser innovativs ed empruvar novas chaussas hajan dentant adina puspè motivà el. Sco exempel numna Silvio Albin l’organisaziun dal servetsch da tgira palliativa en Surselva. Quai project haja el realisà ensemen cun ses team sco emprima regiun dal Grischun. Ed il project saja stà uschè buns, ch’il chantun ha surpiglià quel ed introducì quellas structuras en l’entir chantun Grischun.

Pli cumplex

La lavur el post da cussegliaziun da la Pro Senectute saja sa midà fitg durant ils ultims 20 onns. Cunzunt sajan ils cas daventads pli cumplex cun tut las novas leschas ed ils reglaments pertutgant il sistem da sanadad. Era l’administraziun saja daventada pli e pli gronda e dovria bler dapli temp che pli baud. El haja dentant adina fatg gugent sia lavur ed el saja fitg cuntent cun tut quai ch’el haja cuntanschì, ha Silvio Albin tratg ina emprima bilantscha da sia lavur per la Pro Senectute ed autras organisaziuns da sanadad da la Surselva.

Nov manader

audio
Bunura: Pro Senectute Surselva - bainvegni Curdin Casaulta
ord Actualitad dals 01.09.2016.
laschar ir. Durada: 1 minuta 36 Secundas.

Davent dals 1 da settember surpiglia Curdin Casaulta il post da Silvio Albin. Davent dal 2016 è il manader dal post da cussegliaziun da la Pro Senectute era il manader da l’agentura da la SanaSurselva. Uschia vegn gist quella a fatschentar Curdin Casaulta sco emprim. Ina da las finamiras è da SanaSurselva è da megliurar la collavuraziun tranter las differentas chasas da tgira en Surselva. Dasperas saja era la lavur da cussegliaziun per senioras e seniors ina lavur fitg cumplexa ed intensiva. En mintga cas haja el grond respect da quella lavur, el sa legria dentant da prender d’enconuscher anc meglier las instituziuns da sanadad en Surselva.

Artitgels legids il pli savens