L’avertura da la pendiculara sin il Cuolm da Vi era planisada per la proxima stagiun d’enviern. Quai en il cas ideal. Ma tar la construcziun d’in tal project na saja betg tut adina planisabel, ha ditg Rudolf Büchi, il directur da las pendicularas da Mustér.
Las lavurs s’avanzian dentant bain e quasi tut tenor plan. Sulettamain tar la segunda, da las quatter pitgas dettia in retard. Ils fundaments sajan gia realisads, ma la geologia en quest lieu saja sa mussada auter che quintà. Las ulteriuras pitgas stettian gia ed era las lavurs vi da las staziuns a val e da muntogna giajan tenor plan, uschia Büchi.
Lubientschas da construcziun vegnidas tard
Sco las pendicularas Mustér scrivan en il rapport annual, saja in ulteriur motiv per il retard las lubientschas da construcziun da la vischnanca da Tujetsch. Quellas sajan vegnidas confermadas da la populaziun tujetschina ils 16 da mars, uschia che tut las lubientschas eran avant maun l’entschatta da matg.
Collavuraziun cun Sedrun-Mustér Turissem betg reussida
Las pendicularas da Mustér vulevan realisar ensemen cun l’uniun da turissem da Sedrun-Mustér ina strategia da marketing. Quai na saja dentant betg reussì. Uschia sajan las pendicularas da Sedrun-Andermatt e da Mustér sa decididas da collavurar persulas e da realisar in'organisaziun per promover las destinaziuns.
Ils dus acziunaris principals da las pendicularas Samih Sawiris e Marcus Weber vegnian a timunar l’organisaziun sco presidents dal cussegl d’administraziun. Il proxim temp vegnian els alura a preschentar in CEO cun experientscha internaziunala.
RR novitads 06:00
