En ses roman raquinta Leontina Lergier-Caviezel ina tragedia ch'è capitada en in vitg alpin e che ha fatg stremblir l’entira cuminanza. La giuvna Andrea da la Bassa è maridada en quest vitg e vul vegnir a savair dapli. Quai n'è betg simpel perquai che la persuna pertutgada è mitta dapi la disgrazia. E sco i para ha era la famiglia da ses um, sia sira Trudi e ses sir Pieder, da far insatge cun questa disgrazia.
Tschantschas en il vitg
A l’entschatta haja ella scrit ina istorgia curta sur da la mitta, di l’autura. Ed alura saja l’istorgia sa sviluppada. Impurtant en ses roman èn las famas. En las cuminanzas pitschnas intervegnian ins spert, tge che schabegia. Mo ils detagls restian tschelads.
Sco Leontina Lergier-Caviezel di, haja ella tschertgà ditg in titel, e pir cura ch’ella aveva tant sco finì il cudesch saja ella – durant repassar il text – stgarpitschada sur l’expressiun: ir dad in mugrin a l’auter, vul dir: las tschantschas che sa derasan.
Dis ch'i va tgunsch ed auters pli vess
I haja dà blera lavur da scriver quest roman, sco l’autura raquinta. Savens haja ella stuì adattar l’istorgia, midar ubain cumplettar il text. Adina puspè ha ella fatg notizias. Ella scriva surtut avantmezdi. I dettia dis che quai giaja tgunsch da scriver ed ella haja alura l’impressiun ch’il text saja en urden, auters dis stoppia ella bittar tut davent. Il roman è partì en il prolog e duas parts. En mintga chapitel raquinta ina da las persunas principalas ils schabetgs or da sia perspectiva.
Il terz cudesch
Leontina Lergier-Caviezel è naschida il 1956 e creschida si a Vrin en Val Lumnezia. Ella viva uss cun ses um en la vischinanza da Berna. Ella ha publitgà raquints e poesias en pliras periodicas rumantschas e scriva regularmain columnas per La Quotidiana. Ses emprim cudesch «Romana» è cumparì il 2006 en la ritscha «Nies Tschespet». Il 2011 ha la Chasa Editura Rumantscha CER edì «Nus duas». Ed uss ha la CER edì il terz cudesch da l’autura.
RR actualitad 08:00