Siglir tar il cuntegn

Header

L'entrada da la chasa cumin da Glion cun las bandieras dalla Svizra, dal Grischun e da Glion. L'inscripziun sur l'entrada è "Rathaus" e "Casa Cumin".
Legenda: La chasa cumin a Glion, cun l'inscripziun bilingua. RTR, C. Albin
cuntegn

Surselva Leschas davart il diever dal linguatg per Glion

Il parlament da Glion ha decidì sur da duas novas leschas davart il diever e la promoziun dal rumantsch en l’administraziun communala.

Sin la glista da tractandas da la radunanza dal parlament da la vischnanca da Glion, era ier saira in punct, ch'empermetteva ina discussiun animada ed emoziunala. Il parlament aveva da decider sur da duas leschas pertutgant la bilinguitad ed il diever dal rumantsch: la lescha davart ils linguatgs uffizials e la lescha davart la promoziun dal rumantsch ella vischnanca da Glion.

Bunamain nagina discussiun

I na ha dentant betg da ina gronda discussiun. Omaduas leschas èn vegnidas acceptadas cun ina gronda maioritad dal parlament. La lescha davart ils linguatgs uffizials, tudestg e rumantsch, è vegnida acceptada senza cuntravusch, la lescha davart la promoziun dal rumantsch cun mo 1 cuntravusch.

Las duas leschas squitschadas sin palpiri.
Legenda: Il sboz da las duas novas leschas pertutgant il diever e la promoziun dal rumantsch en la vischnanca da Glion. RTR, C. Albin

Preferì persunal biling

Ina curta discussiun ha i dà pertutgant igl engaschament da novs emploiads. En la proposta da la suprastanza era menziunà, che per regla vegni elegì la persuna che sappia rumantsch, el chass che dus candidats havessan las medemas qualificaziuns. Il parlament ha midà quai passus. Nov vegn preferì la persuna che sappia omaduas linguatgs uffizials.

Referendum facultativ

Las duas leschas na van anc betg definitiv en vigur. A partir da la publicaziun, han persunas cul dretg da votar communal 30 dis temps da pretender ina votaziun dal pievel. I dovra almain 150 persunas cl dretg da votar, che sustegnan il referendum facultativ.

Artitgels legids il pli savens

Scrollar a sanestra Scrollar a dretga