Dapi passa mez onn vesan ins en la vischnanca da Mustér adina puspè lavurers en tumbins a l’ur da la via vid lavurar. Els èn londervi da modernisar la rait fixa da telefonins. Tenor la pledadra da medias da la Swisscom Sabrina Hubacher vul quai dir, ch’i vegn tratg cabels da fibra da vaider pli manaivel da la clientella.
Disturbis
Da questas lavurs senta la clientella da la Swisscom pir insatge cura ch'i dat la midada dal cabel d’arom sin il nov cabel da fibra da vaider. Lura datti tenor Sabrina Hubacher in'interrupziun dad in mez di. Sco ch'ella di avess la clientella da vegnir infurmada var 10 dis avant l’interrupziun.
La modernisaziun porscha ina lingia d’interent pli sperta. La decisiun schebain ins vul profitar da quella u betg, resta però tar il client, punctuescha Sabrina Hubacher.
Ulteriuras modernisaziuns en Surselva
| lieu/fracziun | entschatta | fin |
| Flond | gia en lavur | stad / atun 2016 |
| Surcuolm | gia en lavur | stad / atun 2016 |
| Ruschein | gia en lavur | stad / atun 2016 |
| Ladir | gia en lavur | stad / atun 2016 |
| Falera | atun 2016 | stad 2017 |
| Sursaissa (mo per part) | atun 2016 | anc betg enconuschent |
| Mundaun | atun 2016 | anc betg enconuschent |
| Rueras | 2017 | atun 2017 |
| Mumpé-Medel | 2017 | 2017 |