Ils criteris che 80% da la lavur e dal product ston esser regiunals èn lias vid il certificat «St.Gotthard». Il label che sustegn products regiunals per far enconuschents els sur ils cunfins svizzers.
Fin ussa datti mo dus products da victualias ch’èn certificats da «St.Gotthard». E quai èn in chaschiel dal tessin e da nov la liongia tscherva da la Surselva. Quela liongia ord la mazlaria Carnatira da Rueun adempleschia quests criteris senza problems, quai constatescha Hubert Gross ch'è responsabel per furmar la marca «St.Gotthard».
Sustegn da chantuns e Confederaziun
La marca è vegnida lantschada avant quatter onns. Ella duai far enconuschent products turistics ed auters, er lunsch sur il cunfin da la Svizra ora. Spartas sco sport, traffic public ni era la hotellaria duain profitar da quai num «St.Gotthard» ch’è enconuschents sigl entir mund. Tut quai vegn fatg sin incumbensa dals chantuns Uri, Vallais, Tessin e Grischun. Cun sustegniment da la Confederaziun, e s’auda tar il program da la nova politica regiunala NRP.
Ina schanza per la pitschna mazlaria
La liongia tscherva è igl emprim pass sin la fiera cun il certificat «St.Gotthard». I duain dentant suandar anc auters products ord quella mazlaria. Margrith Janki, la cumpossessura da la Carnatira spera da savair cuntanscher dapli clientella cun questa liongia. Tut tenor il moto: pli indigen e pli natiral che liongia tscherva na datti strusch.
Che Carnatira è l’emprima mazlaria en quest program muntia era ina tscherta protecziun per il product. Sco Hubert Gross di, hajan els betg el senn da certifitgar anc autras liongia tscherva. Sch’in mazler veglia sa participar a quest program stoppia el vegnir cun ina auter product da mazlaria.
RR actualitad 12:00