Suenter diversas emnas vacanzas cumenza ella puspè, la scola. I vegn serius per numerus scolars, scolasts e geniturs. Per l'emprima giada insumma surprenda er Alina Hendry da Mustér ina classa da scola. Ella è scolasta da l'emprima classa a Vella che dumbra dudesch uffants.
L’emprima classa n’è dentant betg la suletta classa che la giuvna instruescha. Ils suentermezdis fa Alina Hendry mintgamai il viadi a Cuschnaus per er dar scola a la quarta e sisavla classa da la Val Lumnezia. Per ella saja quai ina bella variaziun ed ella sa legra d’era dastgar dar scola ad uffants pli vegls.
La dunna da 23 onns è in zic gnervusa da star a partir d'immediat avant ils scolars e las scolaras primaras da la Val Lumnezia.
«Hai gì ditg per preparar tut»
Alina Hendry sa legra sin ses emprim di sco scolasta ed ella spera natiralmain er ch'ella n'haja betg emblidà chaussas impurtantas. Ella haja adina puspè che vegn endament insatge ch'ella savess era anc preparar, dentant
Insacura ston ins era dir: «Uss tanschi. Pli bler na vegn jau betg da far.»
Per la dunna da 23 onns èsi impurtant da stgaffir ina buna relaziun cun sias scolaras e ses scolars. Spezial tar l'emprima classa d'Alina Hendry saja ch'igl è ina classa, nua che las mattatschas domineschan – 10 mattatschas e mo 2 buobs. Qua saja impurtant da guardar ch'ils buobs na vegnian betg sut las rodas, ma quai saja sia lavur, di la scolasta cun in surrir.
RR actualitad 07:00