Curt e concis
- L'Uffizi per la natira e l'ambient dal Grischun ha incumbensà da tschertgar in lieu main sensibel per l'ambient per traversar cun la loipa il Rain.
- La vischnanca ha preschentà ina soluziun ch'è vegnida lubida nua ch'igl è da far giu ogna e gulivar il trassé per la loipa.
- La vischnanca na persvada quest lieu dentant betg. Ella ha purschì maun per pudair realisar vinavant la loipa tranter Mustér e Trun.
- Cun las lingias da provediment per Cavardiras che vegnan manadas sut il Rain ora proximamain è quai en il medem lieu sco la punt actuala da la loipa; la vischnanca vul ch'il chantun repondereschia il project.
La nova varianta da la loipa manass questa davent da Disla vinavant sanester sper il Rain ora fin curt avant la Val Lumpegna, declera il manader d'infrastructura da la vischnanca da Mustér, Ervin Maissen. Là è la traversada dal Rain pli curta ed il Rain na disfa prest mai il fundament, perquai che l'aua curra pli svelt. Per manar la loipa fin là stuessan passa 3'000 m2 ogna vegnir runcada ed il trassé per la loipa stuess vegnir gulivà. I sa tracta d'ognas da muntada naziunala ch'èn protegidas. Latiers vegnan plirs auals che ston vegnir surpassadas cun pitschnas punts. In ulteriur problem è tenor Ervin Maissen era, che la vart sanestra dal Rain è pli sulegliva e che la naiv na po betg tranter l'ogna uschè bain sin la loipa. Ins tema era che l'aua sutterrana pudess procurar che la naiv lieua. L'Uffizi per la natira e l'ambient dal Grischun ha lura fatg la proposta ch'ins faschess ina fundaziun sco tar ina via, sch'ins possia mussar si che la naiv lieua pervia da l'aua sutterrana.
Nus avain lura pensà che sch'ins po far uschia insatge en quest lieu ch'è protegì, lura pon ins metter en dumonda l'entira fatschenta.
Damai che la vischnanca sto ir cun il provediment d'aua, electricitad e la chanalisaziun sut il Rain ora e quai en il conturn dal lieu actual da la punt che maina ils passlunghists sur il Rain vi, veglian els anc ina giada laschar reponderar il chantun schebain ins na po betg tuttina trair a niz las sinergias, declera Ervin Maissen. Uschia vegniss il Rain disturbà sulet en in lieu. Ina resposta vegn spetgada en il decurs dal schaner.
RR actualitad 18:00