Avant quatter onns aveva quai dà in’elecziun da cumbat per il presidi da la vischnanca Lumnezia ch'aveva carmalà 53% da las votantas e votants a l’urna. La reelecziun da Duri Blumenthal sco president è questa giada dentant be stada ina chaussa formala. Cun 328 vuschs è el vegnì reelegì, e quai tar ina participaziun da 31,64%.
Medemamain èn er vegnids reelegids ils sis suprastants ch’han candidà per in'ulteriura perioda d’uffizi.
suprastants
| Fracziun | Prenum e num | Vuschs |
| Cumbel | Curdin Capeder | 331 |
| Lumbrein | Martin Capaul | 313 |
| Vella | Primus Cavegn | 285 |
| Morissen | Daniel Solèr | 268 |
| Suraua | Elisabeth Lorez | 256 |
| Degen | Gioni Capaul | 210 |
| Vrin | anc betg enconuschent | |
| Vignogn | anc betg enconuschent |
Betg cler tgi ch’occupa ils dus posts libers
Per ils dus posts vacants da Vrin e Vignogn han 19 persunas survegnì vuschs. Damai ch’i n’ha betg dà candidats da questas duas fracziuns sto l’emprim vegnir dumandà las persunas cun las pli bleras vuschs en las duas fracziuns sch'ellas acceptan l’elecziun u na. Sche betg vegn dumandà la persuna ch'ha il segund bleras vuschs ed uschia vinavant, fin ch’ina persuna accepta l’elecziun. N’accepta nagin l’elecziun, lura vegn guardà cun las persunas cun las pli bleras vuschs da las autras fracziuns da la Lumnezia. Sch’ins chatta là medemamain nagin che vul surpigliar il post en suprastanza datti in segund scrutini.
Cumissiun da gestiun e cussegl da scola
Ils trais candidats per la cumissiun da gestiun en medemamain reelegids: Rino Caviezel (356), Hilda Livers (339) e Daniel Blumenthal (269).
En il cussegl da scola èn anc be dus dals tschintg posts occupads. Gion Casanova (346) e Martin Schwyter (311) èn vegnids elegids. Sco quai che l’administraziun communala scriva vegnan ils candidats inuffizials ch'han obtegnì vuschs dumandads sch’els acceptan l’elecziun.
RR novitads 17:00