Siglir tar il cuntegn

Header

Visualisierung Überbaung Nurtatsch
Legenda: In emprim studi è sin maisa: Visualisaziun cun cubatura da la surbajegiada sco ella pudess s'integrar en il coc dal vitg. MAD Vischnanca Lumnezia / Gion A. Caminada
cuntegn

Lumnezia La vischnanca vul bajegiar chasa da pliras abitaziuns

La purschida d'abitaziuns da prender a tschains en la Lumnezia è tut autra che gloriusa. Tgi che tschertga en l'internet chatta duas enfin trais abitaziuns sin il martgà. La vischnanca vul meglierar la purschida cun atgnas abitaziuns.

audio
Lumnezia vul realisar surbajegiada a Vella
ord Actualitad dals 15.01.2024. Maletg: RTR
laschar ir. Durada: 3 minutas 12 Secundas.

Las dumondas per pudair prender a tschains ina abitaziun sajan avant maun e la vischnanca saja adina puspè vida ponderar co crear nov spazi d'abitar, uschia il president communal da la vischnanca Lumnezia, Daniel Solèr. En las davosas radunanzas communalas da la vischnanca Lumnezia ha la suprastanza preschentà ils resultats d'in studi che preveda da bajegiar ina surbajegiada cun var 10 abitaziuns a Vella en il coc dil vitg. Latiers duessi dar ina garascha sutterrana.

Nus avain sentì da la populaziun: Quai fissi, faschai quai!
Autur: Daniel Solèr president communal Lumnezia

A Nurtatsch a Vella possedia la vischnanca ina parcella cun potenzial. Per pudair realisar ina surbajegiada pli gronda stuess la vischnanca dentant surpigliar la parcella dals vischins ed integrar la chasa da lezs en il project. Pervia da quels vischins ha l'architect Gion Antoni Caminada fatg in studi.

Las persunas che han la chasa dasperas vulan sanar lur chasa cun Gion Antoni Caminada. Alura è l'idea naschida da far ensemen cun la vischnanca in studi pli grond.
Autur: Daniel Solèr president communal Lumnezia

Enfin che la vischnanca po dar a tschains las abitaziuns giaja però in pèr onns, manegia Daniel Solèr. I dettia anc in pèr sfidas da dumagnar sco contrahar cun ils vischins, reveder parzialmain la planisaziun locala e mirar cun la tgira da monuments che la surbajegiada s'integreschia en il maletg dal vitg. E cura ch'il project è madirs ha il suveran da decider sche la vischnanca duai investir en nov spazi d'abitar.

Ord da l'archiv:

RTR actualitad 11:00

Artitgels legids il pli savens