Marco Coray ha 29 onns, è oriund da Mustér ed abitescha actualmain a Glion. Suenter la matura bilingua ha el studegià giurisprudenza ed istorgia d'art a l'universitad da Turitg. En sia lavur da diplom è el sa fatschentà cun il pictur-artist Matias Spescha. Ils ultims onns ha el lavurà en l'interpresa da sia famiglia sin la sparta d'architectura ed abitar sco contabilist e maina-construcziun.
El succeda ad Anne Louise Joël che banduna la Casa d'Angel suenter avair manà quella cun success ils ultims otg onns. El haja grond respect da vesair co ch'i saja reussì da posiziunar la chasa da cultura, vegn Marco Coray cità en la communicaziun da la fundaziun. El sa legria da survegnir la pussaivladad da promover art e cultura en la regiun e da crescher ensemen cun la Casa d'Angel en la proxima etappa da prosperitad. Sper il post sco manader da la chasa da cultura, vul Marco Coray cuntinuar cun il studi d'istorgia d'art.
Ella è ina chasa da cultura en la Lumnezia che porscha exposiziuns, referats, pitschens concerts, guids ed intermediaziun. La chasa è il bajetg principal per las activitads da la Fundaziun da cultura Lumnezia ch'è la purtadra.
- avertura l'onn 2015 (mainagestiun cun pensum da 30%)
- actualmain passa 3'500 entradas ad onn
- svieuta da var 390'000 francs l'onn 2022 (radund sis giadas tant sco il prim onn ed il pensum da la mainagestiun è tar radund 60%)
«Pliras bunas candidaturas»
Il cussegl da fundaziun haja gì la letga or da pliras bunas candidaturas, hai num en la communicaziun. Tenor il president, Martin Cabalzar, hajan els dà la preferenza ad in giuven indigen ch'empermettia da cuntinuar la lavur cun il medem schlantsch e success sco quai che la manadra actuala haja fatg. Marco Coray cumenza il prim da schaner 2024.
