Dapi l'atun passà tschertga la vischnanca Lumnezia in successur per il chanzlist communal che va en pensiun la fin d'avust da quest onn. Enfin ussa na datti naginas persunas che vulan surpigliar quella plazza.
Situaziun fa quitads
Per il president communal Daniel Solèr n’èsi betg chapaivel che nagin vul surprender la plazza. La situaziun actuala fa quitads ad el. In plan B na datti el mument anc betg. El conceda che la tschertga d’in nov chanzlist u d’ina nova chanzlista ha forsa cumenzà in pau tard.
Ins saveva gia avant plirs onns cura che quai pensiunament succeda ed ussa essan nus relativ curt avant la midada. Ussa n’èsi betg simpel da chattar ina soluziun ch’è buna.
Ina soluziun datti adina
Chattar persunal vegn adina pli pretensius. Quai confirma il manader da l’uffizi da vischnancas Grischun, Thomas Kollegger. Enfin ussa dettia nagin cas enconuschent ch’ina vischnanca n’haja betg chatta ina soluziun. El mender cas stoppian ils pensums vegnir repartids sin auters collavuraturs e collavuraturas
Cler chattan els ina schliaziun ed ins sto mirar ch’ins chatta la schliaziun che correspunda a la situaziun da la Lumnezia.