Dapi l'avust datti en la Val Lumnezia a Vella ina canorta per uffants pitschens. Quai ch'è prest normal en citads e lieus pli gronds, è cun gronds sforzs era vegnì realisà en la Lumnezia. La canorta ha avert la fin d'emna las portas per la publicitad.
Differentas purschidas
La canorta a Vella vegn manada d’Irene Schmutz e da la co-manadra Selina Giger ch’è ensemen cun Michèle Solèr responsabla per la tgira dals uffants. La canorta è averta il glindesdis, mardis, gievgia e venderdis mintgamai da las 6.30 enfin las 18.00. Ella porscha 12 plazs per uffants pitschens da trais mais enfin la vegliadetgna da scoletta. Actualmain vegnan 11 uffants en media per in di e mez en la canorta.
Da la structura dal di profiteschan actualmain sis uffants ed a la maisa da mezdi prendan en media 20 uffants per di part. Durant la maisa da mezdi, u tenor basegns, vegnan las responsablas da la canorta sustegnidas da Carin Cavegn e Corina Alig. Per il mument ha la canorta «Cumbiniala» anc capacitads libras e vul perquai laschar nizzegiar la purschida da famiglias da las vischnancas vischinantas sco per exempel dad Ilanz/Glion ni era da Sursaissa/Mundaun.
Promoziun
L’Uniun Cumbiniala vul generar ina plivalur per l’entira Val Lumnezia. Sco la presidenta da l’uniun Corinne Weishaupt ha ditg, vul l’uniun surprender la rolla da l’intermediatura tranter las generaziuns e per la glieud dals differents vitgs.
La finamira a lunga vista fiss per mai ina chasa da pliras generaziuns. Là nua che tut las generaziuns s’inscuntran.