Siglir tar il cuntegn

Surselva Lumnezia salva il tempo 30

Il pievel da Lumnezia na vul betg instradar la procedura per abolir tempo 30 entaifer la vischanca Lumnezia. Cun 452 na e 440 gea ha il suveran decidì che las zonas da tempo 30 restan tant a Cumbel sco era a Degen.

via cun duas chasas da mintga vart, aura da plievgia
Legenda: Sin quest traject a Cumbel resta la zona da tempo 30. RTR, L.Livers

La dumonda ha procurà per vivas discussiuns entaifer la Val Lumnezia. Era chaschunà discussiuns ha la formulaziun da la dumonda sin ils cedels da votar. L'iniziativa che ha vulì reintroducir il tempo 50 a Cumbel e Degen è vegnida inoltrada cun 170 suttascripziuns valaivlas.

President communal è cuntent

Duri Blumenthal, il president communal da Lumnezia, è satisfatg. Cun questa decisiun haja la populaziun da Lumnezia dà il signal envers anora che decisiuns da las anteriuras vischnancas valian era vinavant, era suenter in temp uschè curt suenter la fusiun. Da la materia possian ins esser da different maini, dentant en il segn politic saja quai ina buna decisiun, uschia ha ditg Blumenthal a Radiotelevisiun Svizra Rumantscha.

RR novitads 12:00