Il recurs inoltrà avess pertutgà il traject dal Biketrail sin il territori dad Uors. Sco il president lumnezian Daniel Solèr ha dentant confermà a la Fundaziun Medias Rumantschas, saja la vischnanca sa cunvegnida ed haja chattà ina schliaziun cun ils recurrents.
Uss stoppia il chantun Grischun anc approvar il project. Daniel Solèr spera dentant da survegnir la lubientscha enfin la fin d'avust per pudair cumenzar a construir il Biketrail anc quest onn.
Vischnanca ha concedì 300'000 francs
La radunanza communala dal december aveva concedì in credit da 300'000 francs per construir ina senda da velos da muntogna. La vischnanca Lumnezia onurescha uschia ses enconuschent convischin e mountainbiker Nino Schurter cun ina senda che porta ses num «Nino Schurter Biketrail».
La ruta va davent da Tersnaus, il vitg nativ da Schurter, ad Uors e Surcasti via Surin a Vrin e davent da là sur Lumbrein, Vella, Degen, Peiden Bogn ed Uors puspè enavos a Tersnaus. La gronda part da la ruta da 35 kilometers è gia existenta, sulet davent da Tersnaus enfin Peiden Bogn sto vegnir construida ina nova senda, quai sin ina lunghezza da bun trais kilometers.
Il nov trassé planisà aveva procurà per discussiuns durant la radunanza communala. Ina proposta da midar il trassé han ils preschents renvià.
