L’Uniun Musical Surselva organisescha per l’onn 2018 il musical Mamma Mia da la gruppa svedaisa ABBA. Da nov è l’uniun organisatura dals musicals e betg pli la scola da Musica Surselva, sco tar ils musicals High School Musical (2009/10) e Grease (2012/13).
La stretga collavuraziun cun la scola da musica resta dentant, ha sincerà il president da l'uniun Daniel Blumenthal. Ultra da quai fan part da la suprastanza Guido Derungs (infrastructura), Petronella Cavegn (maletg da tribuna), Corsin Stecher (manader musical) e Primus Cavegn (tecnica).
Castings questa primavaira
Tenor communicaziun cumenzan ils castings per las chantaduras ed ils chantadurs ils 25 e 26 da mars 2017. L'uschenumnà «recall» ha la finala lieu l’entschatta d’avrigl.
Per pudair inscenar quest musical quintan ils organisaturs cun in budget da radund 300’000 francs. Mo uschia saja quai pussaivel da tegnair il nivel cuntanschì cun ils dus musicals High School Musical e Grease.
Il lieu da producziun dal 2018 n'è anc betg enconuschent, dentant è la sala da scola da Vella (che ha gia servì per Grease) era questa giada en discurs.
Or da l'archiv: 2013 è vegnì preschentà a Vella il musical Grease
audios
RR novitads 14:00