L'onn passà èn tenor indicaziuns da swisstransplant (la fundaziun naziunala che promova, sviluppescha e coordinescha la transplantaziun d'organs en Svizra) 74 persunas ch'eran sin la glista da spetga per in nov organ mortas. 74 persunas savessan forsa anc viver sch'i dess avunda donaturs d'organs en Svizra.
Mancanza d'infurmaziuns in problem
Sco Silvio Albin da l'organisaziun Palliative Care Surselva raquinta, è in grond problem la savida insuffizienta da persunas pertutgant la donaziun e la transplantaziun d'organs. Bleras donaturas e donaturs potenzials temian p.ex., ch'ils organs vegnian prelevads memia baud ni era ch'els sez sajan memia vegls per dar organs. Qua dettia reglas fitg severas, cura ch'in organ possia vegnir prelevà. Ed era sche p.ex. in cor d'ina persuna na vegnia betg en dumonda per ina transplantaziun, dettia anc adina la pussaivladad da dar p.ex. il pulmun, il dir ni in gnirunchel.
Sairas d'infurmaziun
dapli
Per cumbatter quella mancanza d'infurmaziuns organisescha la Palliative Care Surselva sairas d'orientaziun ensemen cun medis e spirituals. Durant ina tala infurmaziun vegnia declerà l'andament d'ina transplantaziun d'organs ed era co in persuna possia daventar donatur d'organs. Dentant era la vart etica e las emoziuns vegnian discutadas, uschia Silvio Albin.
RR actualitad 11:00