Ils manaders da las pendicularas vegnan ad avair gì plaschair da la naiv ch'i ha dà ils ultims dis en il territori: var 20 cm sin 2'000 meters sur mar. Ma era sch'i vesa ora suenter enviern cugliuna la situaziun: Per pudair far pista è la situaziun pretensiusa. Quai di il maschinist Dario Heini.
Il grev da far pista è ch'i dependa quanta naiv ch'igl ha.
Ses servetsch cumenza quest di a las 22:00 uras cun ina curta sesida. Sis maschinists e dus tecnicists da naiv èn en acziun. Sco emprin vai da l'Alp Dado ensi en direcziun Cauma e lura sin il pli aut punct dal territori, sin il Fil (2'418 m s.m.). Perfin sin questa autezza datti lieus che pateschan da pauca naiv. I vent buffa davent quasi tut. Puschels brins cuchegian ora tscha e là da la naiv.
Precisiun grazia al GPS
La lavur da far pistas vegn Dario Heini betg mo da precisar grazia a sia savida, dentant er grazia al GPS. Sia maschina – ina «Pisten Bully 600» melna – n'ha nagin turn da suga, persuenter il ‹SnowSat›, in sistem da GPS. Quel mesira sin 3 cm exact, quanta naiv che giascha sut la maschina. Cun differentas colurs inditgescha il visur, quanta naiv ch'è avant maun e nua ch'i ha anc danvanz naiv. Uschia po Dario Heini stuschar la naiv giu là, nua ch'i fa basegn per gulivar ora la pista. Per pudair far pistas dovra quai almain 50 cm naiv – en terren guliv.
Per far pista dovri vi 50 cm – lura restan 15 cm, sche quai era bella pulvra.
Betg sgarar sin il terren
La pli gronda precauziun tutga al terren. I vala da betg sgarar si quel. Apaina che quai capita prenda tant il terratsch en la pista, sco er il terren donns.
Suenter la pista dal Cauma sin il Fil cuntinuescha la lavur dal trassé dal runal Miret. Er là vesan ins adina puspè fustis che cuchegian ora da la naiv. Fin qua n'era la staziun dal runal betg averta pervia da la mancanza da naiv. Ussa, sch'igl ha almain in zic naiv, po quella vegnida stuschada giu enturn la chamona dal runal. Quel vegnia finalmain avert uss.
Qua vesan ins fitg bain ch'igl ha pauca naiv: Nus essan ids surora ina giada ed i cumenza gia a vegnir brin siadora.
Las situaziuns da preparar pista sumeglian a quellas da la primavaira. Lura, cun naiv loma e bletscha, saja quai grev da stuschar si quella naiv ch'ils skiunzs han stuschà engiu durant il di. La textura loma engrevgescha ina preparaziun. Grazia a ses 6 onns experientscha sco maschinist da Dario Heini dentant bain, tge lieu ch'ha tge sfidas, senza u cun naiv.
Sco ultima etappa da spetga la pista a Val fin a Vuorz (1'102 m s. m.), il punct il pli bass dal territori da skis da Breil/Vuorz – ed era il pli pretensius. Be in per giadas dastga Dario Heini ir sur la naiv via per betg scurreger la situaziun.
Entant che nossa reportascha finescha en quest lieu, turna Dario Heini enavos sin l'Alp Dado per finir il parc ed anc ulteriuras pistas. La lavur è gartegiada, las pistas èn prontas senza gronds fastizs da terra. Ed era sch'ils maschinists han mussà tge ch'els san – era els avessan garantì nagut cunter ina gronda navada.