Siglir tar il cuntegn
cuntegn

Surselva «Mantegnair e promover chanzuns rumantschas»

Tar il «Festival da la chanzun rumantscha» vul ins surtut celebrar las chanzuns rumantschas. Vinavant duessi esser in inscunter tranter ils Rumantschs.

Festival da la chanzun Rumantscha.
Legenda: RTR, Flurin Clalüna

Il «Festival da la chanzun rumantscha» n'è nagina festa da chant normala. Betg ils chors e lur interpretaziuns, ma la chanzun sezza stat en il center. Tenor Clau Scherrer, musicist e president da l'uniun, vul ins surtut celebrar il stgazi da chanzuns e cun quai era la cultura rumantscha. Vinavant vai per promover cumponists e crear novas chanzuns rumantschas. Il budget per il festival è tar 120'000 francs.

«Inscunter interrumantsch»

Tenor la pagina d'internet duai il festival era esser in inscunter tranter tut ils Rumantschs. Tar in sguard sin il program ed en il comité d'organisaziun chatt'ins dentant surtut persunas sursilvanas. Quai saja perquai ch'il festival haja lieu a Trun, uschia Clau Scherrer. Cun quai ch'ins discurra là surtut sursilvan, vul ins era preschentar dapli il sursilvan. La proxima ediziun dal festival haja lieu en in'autra regiun. Lura saja quella regiun en il focus.

Il Festival da la chanzun rumantscha è dals 15 fin ils 17 da mars. Sin il program stattan nov occurenzas. La gronda part dad ellas èn concerts dad artists indigens. Vinavant datti ina discussiun da podium davart «l'olma rumantscha» sco era in «chantar da cumpagnia»

RR actualitad 17:00