Ella ha fatg ord da 100 francs ch'ella ha survegnì l'entschatta – 995 francs. Cun ils daners da las autras candidatas e candidats ha ella pudì recaltgar bunamain 2'000 francs. Quels daners returna Manuela Orlik a tut quels che han gidà ella durant quest temp. Ina gronda part survegn l'ustaria «Schwarzer Engel» che han sustegnì ella gia davent da l'emprima minuta. Dentant era auters che han gidà ella durant quai temp vul ella dar enavos ina part dals daners e dir engraziel per il sustegn.
La finamira era da gudagnar
Gia avant quatter emnas ha Manuela Orlik da S. Benedetg detg cleramain ch'ella vul gudagnar ed avair la fin finala ils pli blers daners en bursa. Cun trais ulteriurs candidats è Manuela Orlik vegnida plazzada amez la citad da Son Gagl cun be 100 francs en satg ed auter nagut. Ni telefonin – ni valisch – ni barschun da dents. Pensum e finamira dal project: chattar lavur, chattar dimora, gudagnar daners. E questa incumbensa ha Manuela Orlik superà grondius. La sfida n'è betg adina stada simpla, ma sch'ins vul dumagnar cun tutta forza insatge, è quai era pussaivel.
Miu giavisch ei ius en vigur, jeu hai gudignau.
Uss è Manuela Orlik enavos en la realitad: Sia vita da mintgadi cun sia famiglia en ses cafè a S. Benedetg, ina fracziun sur la vischnanca da Sumvitg.
Project «Stutz um Stutz»
SRF ha inizià en ina seria da quatter parts in experiment social. Quatter protagonists han sa mesirà en ina citad estra - en quest cas Son Gagl. Els han survegnì sulettamain 100 francs. Nagut auter. Mira dal gieu era da vegnir sur las rundas e da generar durant tschintg dis uschè blers daners sco pussaivel.
RR Famus e glorius 10:30