Marcel Koller sa senta da chasa en Surselva

Igl è nagina casualitad che l’equipa naziunala da ballape da l’Austria sa prepara en la regiun da vacanzas Flem, Laax, Falera sin l’Euro en Frantscha. Il trenader naziunal Marcel Koller ha numnadamain in’abitaziun da vacanzas a Falera. Ma quella n'è betg la raschun per la visita en Surselva.

Laschar ir video «Plievgia permamenta per ballapedists austriacs»

Plievgia permamenta per ballapedists austriacs

2:59 min, Telesguard dals 23.5.2016
Marcel Koller, trenader naziunal da l'Austria. Avrir maletg en lightbox.

Legenda da maletgs: Marcel Koller, il trenader naziunal da l'Austria. RTR, R. Alig

L’abitaziun da vacanzas na saja betg la raschun principala ch’ils Austriacs treneschan quest’emna en Surselva, ha ditg il trenader naziunal Marcel Koller.

Suenter ils resultats excellents en la qualificaziun saja l’euforia uschè gronda en l’Austria ch’els na possian betg trenar en ruaus en l’atgna tiara. Quai ruaus ha Marcel Koller chattà sin la plazza da ballape a Schluein.

Gieu da test encunter Schluein-Glion live sin ORF 1

Dals divers trenaments sin la plazza da ballape a Crap Gries èn mo paucs publics. Bler public vegni dentant a dar gievgia saira cura che la naziunala austriaca dat in gieu da test encunter l’Uniun sportiva Schluein Glion. Il gieu encunter l’equipa da la segunda liga regiunala n’ha per Marcel Koller betg in’enorma impurtanza sportiva.

Mo quest gieu saja in segn d’engraziament envers il club che mettia a disposiziun ses plaz da ballape ed envers ils numerus voluntaris che s’engaschian davos las culissas.

L’Austria pudess daventar ina da las equipas da surpraisa

Sco emprim trenader insumma ha Marcel Koller manà l’Austria ad in campiunadi d’Europa. Il 2008, cura che la Svizra e l’Austria han organisà l’Euro, è l’Austria stada qualifitgada automaticamain. Cun nov victorias e mo in pari è l’Austria marschada tras la qualificaziun.

Giugaders da l'Austria sin il plaz a Schluein. Avrir maletg en lightbox.

Legenda da maletgs: Champ da trenament en Surselva. Cun chapitscha e mongia lunga a Schluein. RTR, R. Alig

L’Austria ha il potenzial da daventar ina da las surpraisas positivas da l’Euro. Ni sco Marcel Koller di: Els na giajan betg en Frantscha mo per giudair il sulegl, il vin, il chaschiel ed ils baguettes.

RR actualitad 17:00