Siglir tar il cuntegn

Surselva Marius Hublard viva en il temp preistoric e medieval

Viver sco Ötzi en il temp preistoric u viver sco Robin Hood en il temp medieval, quai è ina passiun da Marius Hublard.

Marius Hublard cun ils guaffens ch'el ha zambregià sez.
Legenda: Marius Hublard cun ils guaffens dal temp medieval e preistoric ch'el ha zambregià sez. RTR, L. Livers

Per pudair far quai uschè autentic sco pussaivel, ha Marius Hublard visità curs ed emprendì da zambregiar guaffens e vestgadira sco quai ch’ella vegniva purtada da quests temps. Gronda paisa metta el sin tegnair in ord l’auter ils guaffens e la vestgadira dal temp preistoric ed il temp medieval ch’èn 4000 onns. in ord l'auter.

Guaffens dal temp medieval e preistoric.
Legenda: Guaffens dal temp medieval e preistoric. RTR, L. Livers

Tut la vestgadira ch'el ha tratg en, sch’el s’entaupa cun ses collegas da l’Uniun “Prähistorische Jagdtechniken Graubünden" e tut ils guaffens ch’el dovra, ston esser autentics. Quai vul dir, che tut quai sto esser fatg sez. L’emprim balester ch’el ha zambregià, è sta l'entschatta da questa passiun. Ussa posseda el in entir arsenal dals guaffens ch’i deva en il temp preistoric e medieval.

Omadus temps tschiffan Marius Hublard. Il temp medieval è simplamain pli manaivel ad el. Mintga di cura ch’el va a chasa va el sper la ruina da Grüneck vi, quai è per el muments da ponderar tgi ch’el fiss stà, sch’el avess vivì en quest temp. In chatschadur, in pastur, in servient u forsa in chastellan? En mintga cas crescha la fascinaziun cun la fantasia.