Il scumond da mazzar è vegnì decretà suenter ch'i ha dà dasper il cas cun ils portgs anc pliras autras irregularitads en il manaschi a Trun. Quai ha il veterinari chantunal, Giochen Bearth confermà a RTR. Sco el ha ditg, è la lubientscha da mazzar vegnida sistida schebain ch'il manaschi ha in'infrastructura moderna ch'è vegnida averta avant 5 onns. Il scumond pertutga sulet la partiziun da mazzar animals. La partiziun d'elavuraziun da charn n'è betg pertutgada.
Quant ditg ch'il scumond da mazzar resta en vigur, n'ha il veterinari chantunal betg pudì dir, damai ch'i sa tracta d'in cas pendent. Enfin ch'il cas è sclerì poi tenor Bearth cuzzar intginas emnas. Encunter la decisiun da l'Uffizi per la segirtad da victualias po vegnir fatg recurs aifer 30 dis, quai tar il Departament d'economia publica e fatgs socials.
Mazler planisescha da far recurs
La chanzlia giuridica che represchenta il mazler scriva a RTR ch'els sajan da l'avis che l'uffizi disponent n'haja betg resguardà il principi da relaziun tar la decisiun da serrar la partiziun da mazzar. Il mazler pertutgà ha ditg envers RTR ch'el planiseschia da far il recurs tar il departament e ch'el speria da survegnir enavos la lubientscha da mazzar.
