A l’entschatta hai dà dubis e resalvas envers il project. La dumonda centrala saja stada, tgi che fetschia ina tala mazlaria entadim la val, sco Flurin Caviezel da Pitasch sa regorda. El era vegnì elegì emprim actuar. Els sajan dentant stads da l’avis ch’ins possia bain laschar ir l’aua ord la val, ils plazs da lavur stoppian ins dentant tegnair en la val.
Era Arno Deplazes ch'è dapi la fundaziun en suprastanza di, ch’i saja plitost ina surpraisa ch’els possian anc exister oz suenter il temp da turbulenzas. Ma i vegnia meglier e meglier, tut la glieud ed ils purs sajan cuntents.
Transports curts
L’istorgia dal lieu e dals animals constettia, di Martin Sgier – era el fa part da la suprastanza. Ins enconuschia il product ch’ils radund 40 purs da la regiun furneschan. Sco Melanie Nothacker che maina la mazlaria e la stizun a Vrin ensemen cun ses partenari Hermann Huldi di, n'hajan els betg products da rauba en massa. Ils purs transportian sez lur animals (ils transports na cuzzian betg dapli che mes’ura) ed els sajan er preschents, cura che lur animals vegnian mazzads.
I dovra era il sustegn da la populaziun
Il president da la vischnanca Lumnezia, Duri Blumenthal ha ditg en ses pled per il giubileum che quai haja dà a sias uras idealists, che hajan cartì vid il potenzial d’ina mazlaria a Vrin. In tala mazlaria possia surviver mo sch’ins haja davostiers ina istorgia ed era il sustegn da la populaziun.
RR actualitad 07:00