Siglir tar il cuntegn

Surselva Mazzar pli ch’il dubel animals gronds

L’emprima palada per la mazlaria gronda a Trun è succedida. Las lavurs per il bajetg da 2 milliuns francs pon cumenzar.

Aldo Kollegger (architect), Edgar Durschei (ImmoTrun SA), Ivo Nay (mazler) e Vitus Nay (ImmoTrun SA) fan l'emprima palada.
Legenda: Aldo Kollegger (architect), Edgar Durschei (ImmoTrun SA), Ivo Nay (mazler) e Vitus Nay (ImmoTrun SA) fan la prima palada. RTR, G. Hosang

Ivo Nay ha gia dapi 2007 ina mazlaria a Zignau, nua ch’el mazza per purs, chatschaders mo era per auters mazlers. Cun la midada da la lescha avess el da far midadas vi da l’infrastructura per che quella correspundia puspè a la lescha. «Quai n’è betg pussaivel en il lieu actual a Zignau», di il pur e mazler Ivo Nay. Uschia restia ad el be la varianta da bajegiar da nov. Cun la nova mazlaria vul Ivo Nay augmentar il dumber d’animals gronds ch’el mazza per onn da 300 sin var 750.

Ivo Nay spera ch’inqual mazler fetschia era la ponderaziun sch’el veglia investir en nova infrastructura ubain sch’el laschia mazzar in auter mazler che ha ina mazlaria che correspundia a la lescha. Sco concurrenza a la mazlaria gronda a Rueun na vesa Ivo Nay betg sia mazlaria. Quai saia in'alternativa ed animals dettia quai avunda en la regiun. Uschia datti era gia contact cun autras mazlarias che vulan laschar mazzar en l’avegnir a Trun ils animals empè dad ir cun quels per laschar mazzar en la bassa.

Ivo Nay quinta da pudair porscher en il futur fin trais plazzas da lavur. Las lavurs per la mazlaria vegnan a cumenzar proximamain. Ils emprims animals quintan ins da pudair mazzar en la nova mazlaria il schaner 2016.