Monika Schweizer e Jürg Kaiser han cumprà ina chasa a Drual en Val Medel. Durant las lavurs da renovar han il figl ed il bab scuvert ina pictura vid las quatter paraids en stiva.
Maletgs fatgs tranter 1779 – 1800
I saja stà ina surpraisa, di Monika Schweizer. Era ina surpraisa èsi stà per Yolanda Alther che lavura tar il servetsch archeologic dal Grischun. Ella ha documentà la scuverta e scrit in rapport. Sco ella èn ils maletgs vid la paraid vegnids fatgs tranter 1779, cura che la chasa saja vegnida construida, e 1800.
Monograms, in'iscripziun e pictura da decoraziun
Da la pictura sa tracti d’ina vart da maletgs cun chaus, da monograms da Maria e Jesus e l’inscripziun «Iosef», scrit en cotschen, e da l’autra vart da pictura da decoraziun sin in funs blau. La colur è dentant sa midada cun il temp. Sco Yolanda Alther declera, haja il pictur-artist partì las paraids en parts cun malegiar «pilasters» mellen-cotschens.
La structuraziun en mellen e cotschen po chaschunar l'impressiun d'ina architectura da pavillon u chamona d'iert.
Cumplettà vegnia quai cun imitar in ur da gardinas ed entamez penda ina cordella en furma da tulipanas.
La finamira dal pictur-artist saja stà da crear ina bella stiva.
Ina pictura sumeglianta chattan ins a Masauns en Lumnezia ed a Stierva en Surmir.
Fotografar maletgs e pender si intgins
Tge far cun quests maletgs? Monika Schweizer di ch’i custass fitg bler da restaurar quels. Els na sajan dentant betg anc sa decidì tge far, ma probabel veglian els curclar ils maletgs.
Nus vegnin a fotografar quai e pender sin intgins maletgs en chasa, per ch'ins vesia co ch'i ha vis ora.