La Vitrina duai porscher ina vista en il passà ed inspirar per il futur, uschia declera Albert Lutz il project. Suenter sia pensiun, nua ch’el è stà blers onns manader dal museum Rietberg a Turitg, è el savens en sia chasa da vacanzas a Soliva. E perquai che l’interess per films e fotografias è grond saja el sa decidì da realisar, communabel cun Rico Tuor, Gabriel Venzin e Daniela Kienzler in project cultural, ma betg in cudesch. Il cudesch da la val Medel, edì ils onns 90, saja la basa da lur lavur ed era ina cuntinuaziun da quella, ma betg en furma da cudesch, di Lutz.
Emprima stalla planisada per il 2023
Sco emprim duai ina stalla en il vitg da Curaglia vegnir nizzegiada sco spazi d’exposiziun, declera la sviluppadra da la vischnanca da Medel Daniela Kienzler. Il mument sajan ins gia vida tschertgar ils daners necessaris da 260’000 francs. En quels daners saja cumpiglià l’entira lavur voluntara che vegnia prestada dad els, di Kienzler. Sustegn survegnian els era da la vischnanca da Medel. Ma els sperian era sin sustegn da la populaziun, ma betg sulet finanzial, mabain surtut era per il project sez. Cun quai project veglian els realisar plirs films, sur da pliras tematicas ed en quels films veglian els integrar la populaziun, cun intervistas, u era fotografias veglias. Cler, els hajan chattà bler material, ma per realisar e cumplettar il project sajan els adina dependent dal sustegn, di Daniela Kienzler. L’emprima stalla duai vegnir averta il zercladur 2023.