Siglir tar il cuntegn

Surselva Medel: Nagins candidats per il presidi u la suprastanza communala

La vischnanca da Medel n'ha anc adina betg chattà candidats per il presidi u la suprastanza communala. Uschia ha la cumissiun responsabla infurmà ier saira a la radunanza communala.

Vista sin Curaglia, Medel.
Legenda: Las elecziuns èn ils 10 da zercladur. ANR, H. Huonder

Uss tschertga la cumissiun er ordaifer la val candidatas e candidats. Probabel dettia er in inserat. Fin la fin da zercladur stuess Medel avair ina suprastanza nova cun trais commembers. Uschiglio vegniss la vischnanca sut la curatella dal chantun. Las fatschentas impurtantas faschess lura in administratur.

Il fegl sgulant da la cummissiun da la suprastanza communala.
Legenda: Cun quai fegl sgulant ha la cumissiun animà vischinas e vischina da Medel da s'annunziar per la suprastanza communala. mad

Per evitar quai scenari pudess ins far ina roschada en suprastanza: Ina persuna daventa presidenta per in onn e surprendess silsuenter il post en la suprastanza communala.

Quint communal e quint da l'Ovra electrica èn approvads

Plinavant ha il suveran da Medel approvà il quint communal da l'onn 2017. Quel serra cun in gudogn da stgars 15'000 francs, tar entradas totalas da bun 4,5 milliuns francs. Il cashflow munta a strusch 800'000 francs. La radunanza ha er approvà il quint da l'Ovra electrica Medel. Quel serra cun in gudogn da 17'000 francs. Plinavant han votantas e votants detg Gea a la revisiun parziala da la planisaziun locala.

RR novitads 06:00