Suenter ch'ins ha constatà la tschorvadad da chamutschs en ina part da la Val Medel, ha la vischnanca ordinà ina zona da ruaus temporara. Il scumond da passar vala per il territori sanester dal Rain, dal mir da fermada fin a Son Gions, scriva la vischnanca en ina circulara a vischinas e vischins sco era giasts da vacanzas. Il scumond vala fin la fin da matg. Igl è scumandà d'entrar en quest territori, saja quai cun skis, saja quai cun gianellas u er a pe.
Cun la zona da ruaus vulan ins schanegiar ils chamutschs malsauns. Sch'ils chamutschs na vegnan betg disturbads, han els schanzas da guarir. La tschorvadad po bain svanir entaifer dus u trais mais – ella po dentant era avair ina fin mortala, tut tenor en tge stadi ch’ella è.
