Sco la procura publica dal chantun Berna ha attestà, datti in'inquisiziun penala davart delicts economics cunter Peter Brügger, il schef da finanzas da la «Ghelma Gruppe»
Peter Brügger è vegnì relaschà da ses uffizi sco manader da finanzas da la «Ghelma SA» da Meiringen, ha scrit la gasetta «Jungfrau Zeitung». Sco raschun per la relaschada vegnan numnadas irregularitads tar transacziuns finanzialas. Per Peter Brügger vala la presumziun d’innocenza.
Activitads a Breil
Peter Brügger è era activ a Breil en Surselva, tranter auter è el possessur da l'ustaria Burleun en il territori da skis a Breil. La «Burleun Gastro - Event SA» na para betg dad esser pertutgada da las inquisiziuns. Quai attestescha la vicepresidenta dal cussegl d’administraziun, Silvia Brügger. Ella fa attent che questa chaussa pertutgia sulettamain ses um e ses anteriur patrun, pia la «Ghelma SA».
Gia la stad 2020 è Brügger sa retratg da tut ses mandats en las trais societads d'acziunaris enturn las Pendicularas da Breil. Sco quai che Markus Noser, il president da las pendicularas da Breil, ha ditg envers RTR – n'haja quai gì nagin connex cun la chaussa che vegn ussa intercurida.
A Breil ha Brügger bandunà ils davos dis, e quai per immediat, il cussegl d’administraziun da la Golf Breil SA. Quai ha Il president da la Golf Breil SA Marcel Friberg confermà.