Ils ultims onns ha Giochen Bearth fatg part a la Trofea Péz Ault sco currider. Ussa ha el surpiglià il post da schef da cursa. Sia finamira è da mantegnair il nivel dals ultims onns e betg da metter tut sin il chau. Tar las rutas datti dentant tuttina midadas. Uschia saja vegnì fatg tar la ruta lunga da var 14 kilometers ina midada tar l’ascensiun avant Verclisa. L’ascensiun saja ussa pli segira pertutgant lavinas ed ord vista sportiva pli interessanta, declera Giochen Bearth.
Per ils aspectaturs daventa la cursa era pli attractiva. Sco Giochen Bearth di, dettia quai duas midadas. Ina è ch’ils curriders van a Gendusas sper l’ustaria ora. L’autra midada è tar l’arrivada. Davent da la terrassa da l’ustaria a Caischavedra pon ins guardar co ils curriders ston anc currer ils ultims meters senza skis dad ina plaunca siadora per vegnir en l’arrivada.
La cursa duai crescher
La cursa ha duas rutas, ina da 9.5 km ed ina da 14.2 km. Ils curriders cumpetan en duas categorias. Ina categoria da curriders licenziads, che fan part al cup svizzer, ubain ina categoria da curriders amaturs che fan las cursas popularas. Tuts partan en teams da 2 u 3 curriders.
Sper ils arbiters dal cup svizer che controlleschan che la cursa vegn menada atras correct, visita quest onn era in arbiter internaziunal la cursa. Ils organisaturs èn fitg interessads vid il parairi da quest arbiter. «Quel po dir sche nus fissan insumma capabels da manar atras ina cursa internaziunala» di Giochen Bearth. Pertge la finamira dals organisaturs è da crescher. Betg sco ultim en vista a la 10avla ediziun da la Trofea Péz Ault en trais onns.
Per interessents èsi anc pussaivel da s’annunziar. Tenor Giochen Bearth è mintgina e mintgin che fa turas abel da participar a la cursa. S’annunziar per las cursas pon ins anc fin dumengia avant las cursas. Ils detagls èn publitgads sin la pagina d'internet da la Trofea Péz Ault.