Mintga dus onns envida l’uniun da commerzi e mastergn Mustér ad in'exposiziun da professiuns, quest onn per la terza giada. Quest onn è l’exposiziun vegnida averta durant il suentermezdi e las scolas dal stgalim superiur e las sisavlas classas da Breil, Sumvitg-Trun, Mustér e Tujetsch han visità la purschida. Sco quai ch'il president da l’uniun Roland Cajacob di èsi impurtant da pudair sa mussar e da far attent la giuventetgna a la gronda schelta da professiuns en la regiun. En tut èn vegnidas preschentadas almain 25 professiuns, da l'electroinstallatura sur l’assistent da dentist fin al bostger.
-
Bild 1 von 6. Tar la preschentaziun da las professiuns en cuschina han las scolaras ed ils scolars pudì degustar e lignar products. Bildquelle: RTR.
-
Bild 2 von 6. Nua ch'ins pudeva far in gieu era la schanza pli gronda ch'ils giuvenils sa ferman. Bildquelle: RTR.
-
Bild 3 von 6. Las professiuns ch'han da far cun lain eran vi da ina maisa, sco era las autras branschas. Bildquelle: RTR.
-
Bild 4 von 6. Per blers dals giuvenils era la pitschna exposiziun l’emprim contact cun las professiuns. Bildquelle: RTR.
-
Bild 5 von 6. Era l'ambulanza e las professiuns da tgira eran preschentas per mussar lur mastergns divers. Bildquelle: RTR.
-
Bild 6 von 6. Las maschinas agriculas eran postadas ordadora. Bildquelle: RTR.
Preschentar professiuns e betg interpresas
Ina da las ideas saja da preschentar las professiuns u meglier detg las pussaivladads da far in emprendissadi e betg las interpresas sco talas, di Roland Cajacob. Uschia sajan ils scrinaris communablamain vi da ina maisa, sco era ils electricists e las professiuns d’administraziun. Quai fetschia senn e saja era interessant per las interpresas. Ins possia uschia tgirar il contact e forsa emprender in da l’auter, perquai che tuts hajan il medem problem cun chattar emprendistas ed emprendists, di Roland Cajacob. Planisà è da cuntinuar cun questa «mini-future» en dus onns. Ils resuns da las interpresas e da las scolas sajan buns.