Siglir tar il cuntegn

Header

cuntegn

Missiun B In iert per ir a guardar

L'iert dad Esther Schnider a Sursaissa è in iert tut spezial. Betg perquai ch'i crescha insatge spezial, mabain perquai ch'ins po ir en l'iert a guardar el: El è in curtin d'exposiziun, per tudestg in «Schaugarten».

Flurs da tut las colurs, verduras ed ervas creschan tut a dubel en l'iert dad Esther Schnider a Sursaissa. Ins po propi dir, l'iert è biodivers ed er bio. I crescha dal tut – e tut senza chemia. Quai è er impurtant per Esther Schnider e tutga er tar sia definiziun d'in «bun iert». Mintgamai il glindesdi pon ins ir a guardar l'iert da la ortulana. Radund 5 fin 10 persunas vegnan mintgamai a guardar e laschan declerar, tge che crescha tut.

audio
Bunura: Visita en l'iert dad Esther Schnider a Sursaissa
ord Actualitad dals 07.08.2019.
laschar ir. Durada: 2 minutas 53 Secundas.

Insatge sto adina flurir

Per la ortulana èsi impurtant ch'i flurescha adina insatge, uschia hajan numnadamain ils avieuls adina insatge da magliar tar ella. Dentant betg mo ils avieuls sa sentan bain tar ella, mabain er serps, rustgs e cunzunt er bleras tgirallas.

Per che ses iert restia er vinavant spezial e per ch'i rendia lura er dad ir a guardar el, è Esther Schnider adina a la tschertga da novas sorts ed emprova lura dad integrar quellas en ses iert. Magari gartegia quai fitg bain e magari creschia quai er betg. Lura n'haja ella er betg in problem da puspè emblidar la plantina. Tar ella vala: Tge che crescha, crescha e tge che na crescha betg, na crescha betg.

Ord l'archiv:

RR actualitad 08:00

Artitgels legids il pli savens