Dapi il 2014 mainan las Pendicularas Mustér il biro da turissem tar ils spurtegls da la staziun a val da la pendiculara a S. Catrina ed era al spurtegl da la staziun da viafier. Questa decisiun da Sedrun Mustér Turissem ha procurà per discussiuns.
Dira nusch gia dapi il cumenzament
Tenor il president communal Robert Cajacob, han tranter auter la Gastro Mustér - Val Medel, l’uniun da commerzi e mastergn e la politica, gì avant in onn il giavisch da reponderar ils lieus dals biros. Quai aveva lura manà tar ina abdicaziun da la cunvegna da prestaziun cun las pendicularas. L’abdicaziun è dentant vegnida retratga curt suenter, perquai che las Pendicularas Mustér eran sa resentidas e pervi da la nauscha communicaziun.
Cumissiun avess gì da gidar
Sinaquai è dentant vegnì mess ensemen ina cumissiun ch’ha analisà lieus pussaivels per in biro da turissem. Sco Robert Cajacob di, sajan stadas en la cumissiun persunas ord las retschas da quels ch’han pretendì ina midada. Sedrun Mustér Turissem n’hajan ins betg vulì en la cumissiun, perquai che quai saja l’organisaziun turistica che na duai betg prender posiziun, cur ch’i vegnia giavischs.
Las pendicularas na sajan betg stadas da la partida, perquai che lezzas sajan involvidas en la cunvegna da prestaziun da manar actualmain ils biros, declera Robert Cajacob.
Là nua ch’il giast dal di è
La cumissiun ha fatg la proposta a la suprastanza ch’i dovria mo in biro da turissem e ch’i fiss meglier sche quel sa chattia a la staziun. L’argumentaziun è che la staziun è amez il vitg, là nua ch’il giast dal di vegna atras, e ch’igl è fitg simpel da chattar la staziun.
Robert Cajacob declera ch’ils giasts che vegnian a Mustér per far vacanzas u ils giasts che hajan secundas abitaziuns, quels na tschertgian ozendi betg il biro da turissem. Quels hajan gia chattà lur infurmaziuns en l’internet.
Uschia ha la suprastanza discutà la recumandaziun da la cumissiun è giavischà da Sedrun Turissem da desdir la cunvegna da prestaziun cun las Pendicularas Mustér sin il proxim termin pussaivel e prender si tractativas cun la Viafier retica per dischlocar il biro a la staziun. Uschia vegnan la sala da spetga ed ils spurtegls da la staziun da viafier a Mustér adattads als basegns dal biro da turissem e la visibilitad vegn augmentada. Primavaira vegn lura fatg midada.
RR actualitad 06:00