Il boom d’autos d’electro n’ha anc betg propi cuntanschì la Surselva. Uschia n’ha per exempel la garascha Friberg a Rueun anc betg vendì blers autos cun in motor electric.
Ils clients che vulan in tal auto èn savens infurmads fitg bain ed han era la pussaivladad da per exempel chargiar si la battaria da l’auto vi da l’atgna installaziun solara a chasa, di David Friberg, il schef dal lavuratori. Ma els stoppian era mintgamai infurmar las clientas ed ils clients ch’els na sappian anc betg propi co reparar quels autos en 7 u 10 onns, di David Friberg.
Pronts sajan els, cun far curs necessaris e cun investir per exempel en ils guaffens spezials, ma fin uss n’hajan els betg anc gì da far reparaturas vi da motors u uschia, pertge ils autos d’electro han per regla anc garanzia e perquai anc betg chattà la via en las garaschas en la regiun. Ma impurtant saja d’esser pront di David Friberg, era cun la scolaziun quai che pertutga la segirtad.
Sche quai vegnia alura sulet pli autos d’electro, alura vegnian els era a sentir quai en la lavur, pertge ils motors electrics na dovran betg las medemas lavurs, che segireschan era il surviver d’ina garascha, di David Friberg.
Sumegliantas sfidas ed investiziuns en infrastructura
Era la garascha da Leci Deplazes a Surrein ha sumegliantas sfidas. Il mument na saja la motorisaziun electrica anc betg propi arrivada, ma sche tut ils motors fissan electrics alura mancass lavur en garascha. Probabel stuess el alura reducir persunal, di Leci Deplazes, che maina la garascha cun dus mecanists ed in emprendist.
Ma era la lavur è sa midada ils ultims onns, uschia sto ina garascha investir surtut en computers e tala infrastructura. Senza il computer na pon ins betg far lavurs vi dal motor e perquai dovri adina puspè actualisaziuns e novs apparats, quai èn massa daners, ma senza na vai betg, di Leci Deplazes che vegn numnà dals blers Leci da motors. Las lavurs nua ch’ils mauns vegnan anc tschufs èn las bellas lavurs, ma quellas vegnan probabel a svanir pli e pli, pertge ils garaschists futurs han da lavurar cun computer e betg pli cun la zanga.