Il luf-tscherver viva gia dapi radund 20 onns en Surselva. Ma vesair in tal animal è quasi in privilegi. Perquai n'han ins ditg betg pudì dir quants animals che vivan sin l’intschess da la Surselva e Valragn.
Cun il monitoring actual, fatg durant 60 notgs cun var 150 traplas fotograficas han ins pudì cumprovar 14 differents animals creschids. Far la differenza pon ins qua tras, ch’il muster dal pail da mintga luf-tscherver è different.
En futur lufs-tscherver en l’entir chantun
Sco il responsabel per ils animals da rapina da l'Uffizi da chatscha e pestga Arno Puorger ha ditg, saja cler ch’il luf-tscherver vegnia a sa derasar en l’entir chantun. La premissa principala è ch’il pavel è avant maun, quai saja actualmain il cas. Surtut sa nutreschia il luf-tscherver da chavriels e chamutschs. Quel po uschia regular questas populaziuns a moda marcanta, ma era qua èn ins a l’entschatta da las observaziuns.
Cun il monitoring actual possian ins uss cumparegliar la populaziun ed examinar, sch’il luf-tscherver saja capabel da surviver en futur senza restar in animal periclità, ha ditg Arno Puorger.
Convivenza cun il luf
Da principi è la convivenza tranter il luf ed il luf-tscherver ina buna. Ils dus animals èn fitg differents en lur cumportament. Uschia viva il luf-tscherver solitari. Fin uss na datti nagins indizis ch’il luf-tscherver attatga animals da chasa u da niz. Plinavant guntgeschian il luf ed il luf-tscherver che vivan en il medem territori in l’auter. Quai ha scrit il post spezialisà d’animals da rapina KORA en ses rapport.