Il basilais Phillipe Laffer è oriundamain vegnì pervi da l'amur per ina dunna a Morissen. Restà è il producent da musica dentant pervi da la cuntrada ed il ruaus. Dapi 2014 sta il basilais a Morissen, nua ch’el producescha hits da musica. Tranter auter ha el producì albums da bands popularas sco «Hecht», «Panda Lux» e «Kaufmann».
Davent da la truscha a Basilea
Be per registrar musica giaja Phillipe Laffer en ses studio a Basilea. Il rest da la producziun fetschia el en sia abitaziun en Val Lumnezia. Là possia el numnadamain sa focussar meglier. Cura ch’el era anc a Basilea, nua che la scena da musica è ferma, saja la musica er stada suenter sia lavur quotidiana il tema principal. Uschia ch’i saja magari vegnì memia bler ad el.
A Morissen per encunter haja el dapli pussaivladads da sa distanziar per tscherts muments da la musica – per exempel cun giudair la bella cuntrada – avant da sa focussar puspè sin producir musica.
Sia parita da «rocker» – chavels lungs nairs e barba grossa – e ses dialect basilais dat franc en egl a Morissen. Phillipe Laffer di dentant ch’el saja plitost ina persuna discreta. El na craja betg che blers sappian tge ch’el fetschia atgnamain a Morissen. El n'haja er betg il basegn da sunar il zain grond. El giaudia l’anonimitad.
La scena da musica dal Grischun crescha
Era sche la scena da musica en il Grischun n’è betg tuttina gronda sco quella a Basilea saja ella sin buna via da s’etablir sin nivel naziunal, di il musicist. Per exempel mussian las bands «Mischgewebe» e «Kaufmann» actualmain grond potenzial. Era per ina ferma scena da Hiphop saja il Grischun enconuschent. En il passà han interprets sco «Gimma» e «Breitbild» mess il crap da fundament.
