Siglir tar il cuntegn

Header

cuntegn

Surselva Mozart è ina chaussa dal cor

Il Chor Surselva preschenta cun orchester e solists la Missa brevis en F e la cantata Davide penitente da Mozart.

Rest Giusep Tuor dirigia il Chor Surselva
Legenda: Rest Giusep Tuor diregia il chor dapi 1994. RTR, G. Hosang

Concerts:

Avrir la box Serrar la box
  • Sonda, 9.4.2016 las 20.15 a Glion en baselgia catolica
  • Venderdi, 15.4.2016, las 20.15 a Cuira en la baselgia da la s. crusch.
  • Sonda, 16.4.2016, las 20.15 a Sumvitg en la baselgia parochiala

Duas ovras da Mozart chanta il Chor Surselva cun ses var 60 chantaduras e chantadurs. «Dastgar u pudair preschentar ovras da Mozart è insatge ch’ins ha sco musicist adina insanua el chau ubain el cor» di il dirigent Rest Gieri Tuor. Ina ovra è Davide penitente (KV 469) e l’autra è la Missa brevis en F (KV 192). Il Chor Surselva vegn accumpagnà da l’orchester Le Phénix, las solistas Sabina Schnöller (sopran I), Anica Defuns (sopran II) ed il solist Nino Aurelio Gmünder (tenor). Las duas ovras èn tenor il dirigent pretensiusas. «Jau hai adina gugent da quels projects che han insanua in punct u l’auter ch’ins sto star londervi», declera Rest Gieri Tuor. Quai saja la finala era la finamira e la giustificaziun per l’existenza dal Chor Surselva.

audio
Chor Surselva preschenta Mozart
ord RTR Audio dals 05.04.2016.
laschar ir. Durada: 3 minutas 43 Secundas.

Londervi ha era la manadra da project, Marlies Vincenz, stuì star. La pli blera energia hai duvrà per recaltgar il budget da 85’000 francs per il project dal Chor Surselva cun orchester e solists, ha ella ditg. Tar las instituziuns saja quai ozendi pli grev da survegnir sustegn finanzial e perquai saja da scriver il dubel u il traidubel brevs. Ensemen cun las contribuziuns dals chantadurs, sponsurs, donaturs e las entradas dal public saja quai dentant pussaivel da cuvrir ils custs.

Chor Surselva
Legenda: Il Chor Surselva durant in'emprova da chant. RTR, G. Hosang

Artitgels legids il pli savens